Thursday, January 19, 2017

පුතෙකු නම් අවැසිමය !




පුතෙකු නම් අවැසිමය
කවදාක හෝ දිනෙක
මව් පදවි ලබන දින
දස මසක් බලා හිඳ...


උපන්දා පටන් ඔහු තුරුළු කර සිඹින්නට
කුරුල්ලන් පෙන්නමින් කවි කතා කියන්නට
බෝනික්කෝ අතට දී සිත මුදුව හදන්නට
දැනුම ආදරය මිස අන් කිසිත් නොදෙන්නට 


පුතෙකු නම් අවැසිමය
කවදාක හෝ දිනෙක

කියාදෙන්නට ඉතින්
දුවකගේ වටිනකම.... 

තනිවෙන්න ඉඩක් ලද විගස මිතුරිය සමග
ඇගේ සළු පිළි උනා ඉවතකට දමන්නට
නොවේ මට වුවමනා මගේ පුතා හදන්නට
නලවන්න ඇගේ සිත ආදරය දී හදට  


පුතෙකු නම් අවැසිමය
කවදාක හෝ දිනෙක

කියාදෙන්නට ඔහුට
ආදරය කරන්නට......


නලල මත දෙනෙත මත අතක පිටි අල්ල මත
තබන එක හාදුවක මතක ඇය හට දෙන්න
කවදාම හෝ දිනෙක හැකි වුනොත් මගෙ පුතුට
දනිමි මම සතුට ඔහු නිසැකවම ලබන බව 


පුතෙකු නම් අවැසිමය
කවදාක හෝ දිනෙක

මට දැනුණු ආදරය
තවත් දුවකට දෙන්න......... 





1 comment: